Menn reyndu hvorki að temja sér hófsemi né fyrirhyggju

Margt bendir til þess að rótleysi og lítil áhersla á grunngildi hafi dregið menn út á hálan ís í íslensku viðskiptalífi að undanförnu. Fátt bendir til dæmis til þess að menn hafi, að minnsta kosti í ákveðnum fyrirtækjum, reynt að temja sér hófsemi eða fyrirhyggju í fjárfestingum á síðustu árum. Þetta segir Stefán Einar Stefánsson, viðskiptasiðfræðingur hjá Háskólanum í Reykjavík.

Á málfundi í Háskólanum í Reykjavík í gær var fjallað um hugtakið siðrof. Stefán segir að tilgangurinn hafi verið sá að velta upp þeirri spurningu hvort rétt væri að spegla þá atburði sem áttu sér stað hér á Íslandi á haustdögum í þessu tiltekna hugtaki. Það er að segja að velta því upp hvort að ákveðin einkenni siðrofs hafi komið fram í aðdraganda og falli bankanna. „Til þess fengum við til okkar dr. Jón Gunnar Bernburg félagsfræðing og dr. Jón Ólafsson heimspeking sem fluttu framsöguræður og í pallborði eftir þær sátu fyrir svörum ásamt frummælendum þau Bjarni Benediktsson, Katrín Jakobsdóttir og Ólafur Stephensen ritstjóri Morgunblaðsins," segir Stefán Einar í samtali við Fréttastofu.

„Við teljum að efni fundarins eigi erindi við almenning í landinu því nú er mjög mikilvægt að yfirveguð umræða fari fram til þess að gera upp það mikla hrun sem átti sér stað þar sem reynt verður að átta sig á því hvar þjóðin stóð á krossgötum, hvar hefði þurft að grípa inn í á fyrri stigum máls og svo framvegis," bætir Stefán við.