Villa vill slá markamet Raul

Spænski landsliðsmaðurinn David Villa hjá Valencia segist ætla sér að slá markamet gulldrengsins Raul fyrir spænska landsliðið.

David Villa hefur þegar skorað 25 mörk fyrir Spánverja og á því nokkuð langt í land með að ná 44 mörkunum hans Raul, en Villa hefur skorað í sex landsleikjum í röð og er því í fínu formi.

"Í framtíðinni langar mig að slá metið hans Raul. Það er nokkuð langsótt í dag en mig langar að halda áfram að spila og skora fyrir landsliðið. Ég er stoltur af því að klæðast landsliðstreyjunni og það er mér mikilvægt að vera partur af sögunni," sagði Villa.

Hann hefur verið frá keppni vegna meiðsla í tvær vikur en er staðráðinn í að ná leik Spánverja við Tyrki um helgina.