Eiður Smári sá eini sem hefur skorað á móti Skotum

Íslenska karlalandsliðið hefur tapað öllum sex landsleikjum sínum á móti Skotum en þjóðirnar mætast á Hampden Park í kvöld í undankeppni HM. Íslenska liðið hefur aðeins skorað tvö mörk í þessum sex leikjum.

Eiður Smári Guðjohnsen hefur skorað í tveimur síðustu landsleikjum á móti Skotum og er eini íslenski landsliðsmaðurinn sem hefur náð að skora á móti Skotum. Markatalan í sex landsleikjum þjóðanna er 2-11 Skotunum í vil.

Fyrsti leikur Íslands og Skotlands var á milli áhugamannaliðs Skota og Íslendinga á Laugardalsvellinum 27. júlí 1964. Skotar unnu leikinn 1-0. Sigurmarkið kom sjö mínútum fyrir hálfleik þegar íslenski markvörðurinn blindaðist af kvöldsólinni.

Fyrsti leikur þjóðanna í keppni var í undankeppni HM í Mexíkó 1986. Leikurinn fór fram á Hampden Park 17. október 1984 og lauk með 3-0 sigri Skota. Paul McStay skoraði 2 mörk í fyrri hálfleik og Charlie Nicholas innsiglaði sigurinn.

Skotar unnu seinni leikinn á Laugardalsvellinum 28. maí 1985 en eina mark leiksins kom ekki fyrr en á 87. mínútu og það skoraði Íslandsvinurinn Jim Bett. Fyrr í leiknum hafi Jim Leighton varið vítaspyrnu frá Teiti Þórðarsyni.

Skotar unnu fyrri leikinn í undankeppni EM í Portúgal 2004, 2-0 á Laugardalsvellinum 12. október 2002 og þann síðari, 2-1, 29. mars 2003 eftir að Eiður Smári hafði jafnað leikinn.

Síðasti leikur þjóðanna var síðan á Laugardalsvelli 10. september síðastliðinn þar sem Skotar unnu 2-1 eftir að hafa komist í 2-0 eftir klukkutíma leik. Eiður Smári minnkaði muninn úr vítaspyrnu á 77. mínútu.

Landsleikir Íslands og Skotlands:

Laugardalsvöllur, 27.7.1964 Ísland-Skotland 0-1

Hampden Park, 17.10.1984 Skotland-Ísland 3-0

Laugardalsvöllur, 28.5.1985 Ísland-Skotland 0-1

Laugardalsvöllur, 12.10.2002 Ísland-Skotland 0-2

Hampden Park, 29.3.2003 Skotland-Ísland 2-1

Laugardalsvöllur, 10.9.2008 Ísland-Skotland 1-2

Leikir 6

Sigrar Íslands 0

Sigrar Skotlands 6

Jafntefli 0

Mörk Íslands 2

Mörk Skotlands 11