Framherjaálög á enska landsliðinu - Bent meiddist

Enska landsliðið er búið að missa enn einn framherjann í meiðsli eftir að ljóst var að Darren Bent getur ekki tekið þátt í leiknum á móti Úkraínu í undankeppni HM á morgun. Fabio Capello, þjálfari enska landsliðsins, hefur valið Gabriel Agbonlahor í hans stað.

Darren Bent kom inn í enska hópinn eftir vináttulandsleikinn á móti Slóvakíu um helgina en í þeim leik meiddust bæði Emile Heskey og Carlton Cole. Bent meiddist síðan á hné á fyrstu æfingunni sinn í gær.

„Hann fann fyrir frekari verkjum í upphitun í morgun og hætti á æfingunni. Ég hef kallað á Agbonlahor en ég ætla að byrja með Peter Crouch einan frammi," sagði Fabio Capello.

Það mætti halda að það séu einhver framherjaálög á enska landsliðinu. Emile Heskey meiddist eftir aðeins fimmtán mínútna leik á móti Slóvökum. Carlton Cole kom inn fyrir hann en tognaði á vöðva eftir 34 mínútur og á endanum fór varamaður hans, Peter Crouch, einnig haltrandi útaf. Meiðsli Crouch voru ekki alvarlega og hann verður með á móti Úkraínu.