Icesave deilan gríðarlega ójafn leikur

„Þetta er bara í takt við allt annað í þessu. Það er alveg sama hvað það er. Það er allt sett á okkur, bara allt," segir Ólöf Nordal, þingmaður Sjálfstæðisflokksins, um þá kröfu Breta að Íslendingar greiði þeim 2 milljarða íslenskra króna vegna lögfræðikostnaðar þeirra af Icesavemálinu.

Ragnar Hall hæstaréttarlögmaður greindi frá því á málstofu á vegum Háskóla Íslands í hádeginu í dag að Íslendingum væri ætlað að greiða þennan kostnað og frumvarp ríkisstjórnarinnar vegna samkomulagsins gerði ráð fyrir ríkisábyrgð á þeim greiðslum.

„Það væri fróðlegt að sjá hver kostnaður Íslendinga af þessum málarekstri hefði verið til samanburðar," segir Ólöf og bendir á að þá myndu menn fyrst sjá hverskonar kapp Bretar hafi lagt í málið. „Þeir hafa undirbúið sig gríðarlega vel og gert allt til að ná sínum rétti fram. Og mér finnst þetta hafa verið gríðarlega ójafn leikur," segir Ólöf.