Fjandsamleg yfirtaka í Framsóknarflokknum

Hópur framsóknarmanna sem sótti fundi Framsóknarfélags Reykjavíkur í gærkvöldi segist hafa orðið vitni að fjandsamlegri yfirtöku á félaginu. Efni fundarins var val á fulltrúum þess á flokksþing Framsóknarflokksins síðar í mánuðinum. Þetta kemur fram í yfirlýsingu frá hópnum en á meðal þeirra sem skrifa undir hana er Sæunn Stefánsdóttir, núverandi ritari Framsóknarflokksins.

„Á fundinum urðum við vitni að fjandsamlegri yfirtöku á félaginu. Hún var gerð með skráningu um 70 nýrra félaga undir lok dags og mættu hinir nýju félagar á fundinn. Með þeim hætti var félagið tekið yfir og tillaga borin fram um nýjan fulltrúalista á flokksþing í stað þess sem stjórn hafði lagt fram. Sá listi var tilraun til að hleypa að öllum sjónarmiðum og því að okkar mati lýðræðislega unnin. Jafnframt var gerð tilraun til að setja fundarstjóra af til að ná tökum á fundinum. Ekki kom fram að yfirtakan byggði á nokkrum málefnalegim grundvelli heldur var tilgangurinn greinilega sá að fá nýjan hóp framsóknarmanna með atkvæðisrétt á flokksþingið sem framundan er," segir í yfirlýsingunni.

Hópurinn segist fordæma þau vinnubrögð sem þarna voru viðhöfð og að hann telji þau í algerri andstöðu við vilja fólks um ný vinnubrögð í stjórnmálum. Framsóknarflokkurinn nái ekki trausti kjósenda með þessum hætti og fjandsamleg yfirtaka líkt og sú sem hafi átt sér stað í gærkvöldi lýsi andlýðræðislegum vinnubrögðum.