Vinur rappstjarnanna heldur tónleika á Íslandi

17. desember 2009 02:00

Ógleymanlegir tónleikar.
Sævar Daníel Kolandavelu lofar góðum tónleikum með tónlistarmanninumF. Stokes annað kvöld. Stokes hefur unnið með köppum á borð við Jay-Z og 50 Cent. — Ógleymanlegir tónleikar. Sævar Daníel Kolandavelu lofar góðum tónleikum með tónlistarmanninumF. Stokes annað kvöld. Stokes hefur unnið með köppum á borð við Jay-Z og 50 Cent.

Erlendir rapparar hafa verið sjaldséðir hér á landi frá því að 50 Cent og Snoop Dogg fylltu tónleikahallir höfuðborgarinnar. Það er því gleðiefni að bandarískur rappari ætlar að halda þrenna tónleika hér á landi.

Bandaríski rapparinn F. Stokes mun halda þrenna tónleika hér á landi dagana 17. og 18. desember á vegum verslunarinnar Mohawks. F. Stokes gaf nýverið út plötuna Death of a Handsome Bride og er viðkoman hér á landi hluti af tónleikaferðalagi hans um Evrópu. Rapparinn hefur unnið náið með nöfnum á borð við 50 Cent, Jay-Z, Kanye West og Wu Tang Clan.

Sævar Daníel Kolandavelu, einnig þekktur sem tónlistarmaðurinn Poetrix, er einn þeirra sem standa fyrir tónleikunum. Hann segir ástæðuna fyrir því að hann vildi fá F. Stokes til landsins vera þá að tónlist hans sé góð og sérstaklega persónuleg. „Rappstíllinn er einstaklega einlægur, svalur og beittur, allt á sama tíma. Það er óvanalegt þegar rapparar frá þeirri senu sem hann tilheyrir fjalla um þau viðfangsefni sem hann rappar um. Það sem gerir hann líka sérstakan er að þrátt fyrir að hafa öll þau tengsl sem þarf til að verða að stórstjörnu þá neitar hann að gera nokkrar málamiðlanir hvað tónlist hans varðar," útskýrir Sævar Daníel og bætir við að aðdáendahópur F. Stokes fari vaxandi hér á landi.

„Í hip hoppi snýst allt um að vera ekta og hann er eins ekta og þeir gerast. Það er búið að vera nokkur lægð í innflutningi á erlendum hiphopp-listamönnum og okkur langaði að nýta þetta einstaka tækifæri til að styðja við tónlistarsenuna," segir Sævar Daníel sem lofar ógleymanlegu kvöldi.

Á tónleikunum koma einnig fram íslensku tónlistarmennirnir Emmsjé Gauti og Diddi Fel sem hafa verið að gera góða hluti undanfarið. F. Stokes heldur þrenna tónleika eins og áður sagði og fara þeir fyrstu fram á Kaffi Rót klukkan 17.00 í dag. Næstu tónleikar fara fram á Batteríinu í kvöld klukkan 21.00 og þeir þriðju á 800 Bar á Selfossi annað kvöld klukkan 23.00.

sara@frettabladid.is

Mest lesið

Fleiri fréttir

Mest lesið

Fleiri fréttir

Mest lesið

Tarot dagsins