Kaka tryggði Brössum sigur í uppbótartíma

Brasilía vann 4-3 sigur á Egyptalandi í fyrsta leik liðanna í Álfukeppninni sem nú fer fram í Suður-Afríku.

Kaka kom Brasilíu yfir strax á fimmtu mínútu leiksins en Mohamed Zidan jafnaði metin aðeins fjórum mínútum síðar.

Luis Fabiano endurheimti þó forystuna fyrir Brasilíu á tólftu mínútu og Juan Silveira dos Santos bætti því þriðja við áður en fyrri hálfleik lauk.

En Egyptar náðu aftur að jafna leikinn með tveimur mörkum á tveimur mínútum. Fyrst skoraði Mohamed Shawky á 54. mínútu og svo Zidan mínútu síðar.

En Kaka innsiglaði sigurinn sem fyrr segir með marki úr vítaspyrnu þegar að venjulegur leiktími var liðinn. Vítið var dæmt eftir að varnarmaður Egypta var dæmdur brotlegur fyrir að handleika knöttinn á marklínu.

Þetta var fyrsti leikurinn í B-riðli en sá síðari í dag er viðureign Bandaríkjanna og Ítalíu sem hefst klukkan 18.30.