Stefán æfir Grinch með Christopher Lloyd

Stefán Karl Stefánsson mun endurtaka hlutverk Trölla í söngleiknum um hvernig þessi höfuðpersóna Dr. Seuss stal jólunum. Stefán mun hins vegar leika hlutverkið á móti öðrum leikara, engum öðrum en gamla brýninu Christopher Lloyd.

Lloyd á að baki næstum 35 ára feril í Hollywood en hans fyrsta hlutverk var í Óskarsverðlaunamyndinni One Flew Over the Cuckoo’s Nest árið 1975. Þekktastur er hann þó örugglega fyrir leik sinn í tímaflakksmyndunum Back to the Future þar sem hann fór á kostum í hlutverki Emmet Brown.

Annar og ekkert síður þekktur leikari í Hollywood, John Larroquette, leikur einnig í sýningunni en hann leikur Old Max.

Stefán segist vera hálfgerð varaskeifa fyrir Lloyd, hann muni hlaupa undir bagga þegar sá gamli þreytist enda Lloyd orðinn 71 árs gamall og sýningin er ekkert lamb að leika sér við, líkamlega.

„Það verða svona helmingaskipti hjá okkur,“ segir Stefán og bætir því við að Lloyd flokkist reyndar sem Íslandsvinur og gerði það áður en leiðir þeirra tveggja lágu saman.

„Já, hann sagðist hafa komið til Íslands í kringum sjöunda áratuginn og sá einhver íslensk leikverk sem hann hreifst mjög af. Hann hafði líka mikla samúð með okkur vegna efnahagshrunsins,“ segir Stefán og viðurkennir að Lloyd sé ein af gömlu hetjunum hans úr bíómyndunum.

„Þetta er mjög skemmtilegt og náttúrlega frábært tækifæri fyrir mig að fá að vinna með honum,“ en samstarf þeirra tveggja er mjög náið á meðan æfingum standa enda þekkir íslenski leikarinn hlutverkið eins og lófann á sér eftir að hafa leikið það í ótalmörgum sýningum í fyrra í San Diego. „Og svo er ég titlaður „assistant dance captain“ en það þýðir að ég hjálpa honum við danssporinn sem eru stiginn í sýningunni.“

Stefán segir Lloyd annars vera fínan karl sem sé ákaflega hlýlegur og vinalegur.

Áætlað er að söngleikurinn verði frumsýndur í hinu sögufræga leikhúsi Los Angels-borgar, Pantages Theater, þann 14. nóvember en gert er ráð fyrir að það verði sýnt tólf sinnum í viku. Stefán hefur reyndar staðið í stórræðum að undanförnu því fjölskyldan er nú flutt aftur til Los Angeles eftir að hafa búið í San Diego um nokkurt skeið.

„Við höfum reyndar verið að bíða eftir þessu tækifæri, að snúa aftur til L.A. Því þótt San Diego sé alveg ágætis borg þá er miklu meira um að vera hérna,“ segir Stefán.