Strumparnir syngja Bahama-lag Ingós

Tvö lög með Ingó og Veðurguðunum verða á nýrri Strumpaplötu sem kemur út 17. nóvember, þar á meðal titillagið Bahama. „Ég sagði bara já þegar ég var spurður hvort það mætti nota lögin á Strumpaplötu því krakkarnir hafa örugglega gaman af þessu," segir Ingó.

Lagið hans Bahama hefur notið mikilla vinsælda, rétt eins og Macarena-lagið sem var á gríðarlega vinsælli Strumpaplötu sem kom út 1996. Seldist hún í hátt í þrettán þúsund eintökum. Tvær Strumpaplötur fylgdu í kjölfarið sem seldust samanlagt í um tíu þúsund eintökum. Stefgjöld renna til þeirra sem eiga lög á Strumpaplötum og því mætti ætla að Ingó fengi þar vænan skerf í sinn hlut.

„Ég var ekki að búa mig undir að græða mikið á þessari Strumpaplötu. Miðað við að við höfum ekkert mokgrætt á Veðurguðaplötunni þá er, held ég, erfitt að græða mikið á Strumpa­plötunni enda erum við bara með tvö lög."

Alls verða tíu vinsæl íslensk lög á plötunni auk fjögurra frá belgíska Strumpa-rétthafanum. Strumpasöngvararnir verða þeir sömu og síðast, þeir Einar Rúnarsson og Björgvin Ploder úr Sniglabandinu. „Ég náði varla að stynja upp erindið áður en þeir sögðu já," segir Eiður Arnarsson hjá Senu. Hann telur það hið besta mál fyrir Ingó að fá höfundarlaun fyrir plötuna. „Ef hann græðir þá græðum við líka í þessu tilfelli."

Á meðal fleiri laga á plötunni verða Sódóma með Sálinni, Stuðmannalagið Manstu ekki eftir mér og Týnda kynslóðin eftir Bjartmar Guðlaugsson. „Það veittu allir góðfúslegt leyfi og þetta þótti mörgum hverjum afskaplega mikill heiður," segir Eiður. - fb