Deilan óleyst

Annarri umræðu um frumvarp ríkisstjórnarinnar um Icesave reikninga Landsbankans hófst á nýjan leik klukkan níu í kvöld. Óvíst er hvort umræðunni ljúki í kvöld og greidd verði atkvæði um málið á morgun eins og samið var um fyrir helgi. Deilan er því óleyst.

Stjórn og stjórnarandstaða gengu frá samkomulagi á föstudag sem fól í sér að annarri umræðu lyki í dag eða kvöld og atkvæðagreiðsla færi fram um málið á morgun. Þetta samkomulag komst í uppnám í morgun þegar fulltrúar Framsóknarflokks og Hreyfingarinnar í fjárlaganefnd gengu af fundi nefndarinnar þar sem þeir töldu að verið væri að fara á bakvið samkomulagið.

Þorgerður Katrín Gunnarsdóttir, varaformaður Sjálfstæðisflokksins, sagði þegar umræðan hófst á nýjan leik í kvöld að dagurinn hefði verið afar undarlegur. Ljóst væri að stjórnarmeirihlutinn væri að hlaupast undan merkjum því innan stjórnarliðsins væru einhverjir sem teldu að meirihlutinn hefði samið af sér fyrir helgi.

„Það gengur náttúrulega ekki ef að fyrrum forseti þingsins, núverandi formaður fjárlagalefndar, er reyna að koma sér undan samkomulagi sem gert var hér fyrir helgi. Mér er alveg sama þó einhver hluti stjórnarmeirihlutans telji sig vera hlunnfarinn og að við í stjórnarandstöðunni hefðum fengið miklu áorkað. Þetta snýst ekki um stjórn- eða stjórnarandstöðu, hversu oft eigum við að þurfa að segja ykkur það," sagði varaformaðurinn.