Þjórsá haldið fyrir aðra atvinnukosti

Össur Skarphéðinsson segist ekki leggjast gegn því að neðri Þjórsá verði virkjuð þótt hann vilji ekki að orkan fari til Helguvíkur. "Ég hef aldrei útlokað neðri Þjórsá. Ég hef aldrei sagt heldur að það eigi að ráðast í það," segir Össur.

Hann segir að í samþykkt Landsvirkjunar í fyrra, um að semja ekki um orksusölu til nýrra álvera suðvestanlands að sinni, felist sú stefna ríkisstjórnarinnar að halda neðri Þjórsá fyrir aðra atvinnukosti.

"Við töldum, áður en kreppan brast á, að það væru að rísa miklir möguleikar á að fá hingað annarskonar fyrirtæki í því sem við getum kallað umhverfisvæn hátækniiðja. Þeir möguleikar hafa því miður kulnað svolítið," segir Össur en telur þá smámsaman vera að vakna aftur. Menn verði að hafa borð fyrir báru og möguleika til að sækja orku í þessu verkefni, hvort sem það verði í neðri Þjórsá eða eitthvað annað.

Netaþjónabú á Keflavíkurflugvelli var eitt þessara verkefna. Vilhjálmur Þorsteinsson, forsvarsmaður þess, kvaðst í dag hóflega bjartsýnn á að það yrði að veruleika. Það myndi skýrast á næstu vikum en af allt gengi upp gæti starfsemi þar hafist eftir rúmt ár.

Kísilflöguverksmiðja var einnig í stöðunni en þótt fyrirtæki sem hugðist reisa slíka verksmiðju í Þorlákshöfn hafi í staðinn valið Kanada segir Össur önnur fyrirtæki á því sviði áhugasöm. Tvenn slík fyrirtæki hafi ennþá sterkan áhuga á Íslandi og eftir að kreppan skall á hafi tvö önnur fyrirtæki einnig leitað hófanna; eitt stórt og eitt lítið.