Yoko og Sean tróðu óvænt upp

Yoko Ono og sonur hennar Sean Lennon tróðu óvænt upp á minningartónleikum um John Lennon í Hafnarhúsinu í gærkvöldi.

"Come Together" söng John Lennon með Bítlunum á sínum tíma og gamli Pelikaninn Jón Ólafsson bassaleikari tók það lag með tilþrifum á minningartónleikum um Lennon í Hafnarhúsinu í gærkvöldi. Fólk tók Lennon á orðinu og kom saman því fjölmennt var á þessum frítónleikum sem Yoko Ono gaf Íslendingum í afmælisgjöf á fæðingardegi eiginmannsins og sonarins Sean Lennon í gær.

Fyrr um kvöldið hafði Yoko tendrað á friðarsúlunni með fyrirskipun frá útsýnisherbergi Nordica hótelsins, en ófært var til Viðeyjar vegna veðurs.

Í viðtali við Andreu Jónsdóttur í beinni útsendingu á Rás tvö upplýsti Yoko að gígur sem myndaðist á tunglinu í gær þegar eldflaug var hrapað þar til að kanna hvort vatn væri á tunglinu, hafi verið skýrður Friður, til heiðurs John Lennon. Lennon er því kominn til tunglsins. Margir góðir listamenn tróðu upp á tónleikunum í gær, meðal annarra hinn ungi og hæfileikaríki Eyþór Ingi Gunnlaugsson.

Og að sjálfsögðu var frægasta lag Lennons, Imagine spilað. Magnús Kjartansson lék það á píanó og söng af mikilli innlifun og salurinn kveikti á kveikjurum og ekkjan Yoko fylgdist með upp á svölum og komst við.

Gestirnir voru alls grunlausir þegar BH var að syngja síðasta lag tónleikana að óvæntir gestir myndu stíga á svið á afmælisdegi Lennons og Sean. Öllum að óvörum steig drottningin sjálf á svið með öllum þeim söngvurum sem sungið höfðu fyrr um kvöldið og sonurinn og afmælisbarnið Sean settist við trommurnar.

Hljóðnemi Seans klikkaði svo hann gat ekki sungið aðalrödd föður síns í laginu en Helgi Björnsson hljóp fagmannlega í skarðið og salurinn tók vel undir.