Mexíkó búið að reka Sven-Göran

Knattspyrnusamband Mexíkó hefur sagt upp samningi við Svíann Sven-Göran Eriksson. Hann náði ekki að halda starfi sínu sem landsliðsþjálfari Mexíkó í eitt ár.

Landslið Mexíkó tapaði fyrir Hondúras, 3-1, í vikunni og var það kornið sem fyllti mælinn. Mexíkó hefur unnið alla heimaleiki sína undir stjórn Erikssons en gengi liðsins á útivelli hefur verið hörmulegt.

Staða liðsins í undankeppni HM er ekki eins og búist var við og þarf Mexíkó líklega að fara í umspil um sæti á HM eins og staðan er í dag.

Eriksson tók við starfinu af Hugo Sanchez í júní síðastliðnum.