Adebayor valinn leikmaður ársins í Afríku

Emmanuel Adebayor, leikmaður Arsenal, var í dag kjörinn knattspyrnumaður ársins af afríska knattspyrnusambandinu.

Það erulandsliðsþjálfarar aðildarlandanna 52 sem taka þátt í kjörinu en Adebayor var efstur með 74 stig. Egyptinn Mohamed Aboutrika var í öðru sæti með 53 stig.

Adebayor skoraði 24 mörk fyrir Arsenal á síðasta tímabili í ensku úrvalsdeildinni og fjögur mörk í þremur leikjum með landsliði Tógó í undankeppni HM.

Aboutrika hlaut verðlaun sem besti knattspyrnumaðurinn sem leikur í Afríku en hann spilar með Al Ahly í Egyptalandi. Al Ahly var kjörið félagslið ársins og lið Egyptalands besta landsliðið. Hassan Shehata, landsliðsþjálfari Egypta, var þjálfari ársins.

Salomon Kalou, leikmaður Chelsea og Fílabeinsstrandarinnar, var kjörinn besti ungi leikmaðurinn.