Gerir plötu fyrir góðærisgróða

Ceres 4 gefur á næsta ári út nýja plötu. Hann segir að Merzedes Club hafi hrunið með hagkerfinu.

„Ég er með horn, ég er með hala, svík alla með fagurgala,“ syngur Ceres 4 í glænýju lagi sem heitir Fagurgalinn. Síðast var Ceres 4, eða Hlynur Áskelsson eins og hann heitir, á ferðinni með sólóefni árið 2004 á plötunni C4. Þarna á milli var hann auðvitað að hala feitt inn með Merzedes Club.

„Ég hef sagt það áður og segi það enn, að Merzedes Club er mesta pönk sem ég hef gert,“ segir Hlynur. „Við spiluðum á öllum dýrustu samkomunum. Af mörgu skrítnu var allra mesta ruglið þegar við spiluðum fyrir Landsbankann í Egilshöll. Þar fékk maður alvöru rokkstjörnumeðferð baksviðs; stórsteikur, brennivín, förðun og axlanudd. Ég þáði að vísu ekki nuddið því það hefði messað upp brúnkuspreyinu. Sviðsmyndin hefði dugað U2; hringlaga svið úti á miðju gólfi og sánd og ljósasjó dauðans. Ég held að skilanefnd bankans og sérstakur saksóknari bankahrunsins eigi eftir að fara ofan í saumana á þessu mikla partíi og draga einhvern til saka. Stemningin þarna var svona svolítið „Berlín í apríl 1945“. Allir að skemmta sér í síðasta sinn! Þarna vorum við brúnkusmurð að mæma og fengum hundruð þúsunda fyrir.“

Nokkrum mánuðum síðar var allt hrunið og Merzedes Club líka. „Bandið hrundi með hagkerfinu,“ segir Hlynur. „En peningarnir hurfu ekki, að minnsta kosti ekki minn peningur. Ég tók allan Merzedes Club-peninginn og setti hann í upptökukostnaðinn á nýju plötunni minni. Góðærið skilur því ekki bara eftir sig sviðna jörð heldur líka menningarverðmæti og góðar minningar sem hægt er að orna sér við í komandi harðæri.“

Ceres 4 er með úrvalslið með sér. Jóhann Hjörleifsson úr Sálinni trommar, Stefán Magnússon er á gítar og bassa og Jón Ólafsson er á hljómborð og semur mörg laganna. Ceres þvertekur fyrir að það sé eintómt kreppuvæl á nýju plötunni. „Nei, nei, ég syng alveg um ástina og lífið líka. Þetta er langmýksta tónlistin sem komið hefur frá mér, mun minna pönk en vanalega. Ég er búinn að taka upp tólf lög fyrir góðærispeningana og er núna að safna fyrir framleiðslukostnaðinum. Þetta kemur ekki út á föstu formi fyrr en á næsta ári, en maður dritar einhverjum lögum út fyrst.“