Endurreisn og uppbygging

Endurreisn íslensks hagkerfis og atvinnulífs þarf að hefjast sem fyrst. Tíminn er dýrmætur og nú í aðdraganda kosninga hefur fjöldi manns boðið sig fram til þessa verks og miklu skiptir að vel takist til við val á góðu fólki.

Ég býð mig fram í 4. sæti í prófkjöri sjálfstæðismanna í Reykjavík. Framundan eru gríðarlega stór og mikilvæg verkefni og þar skiptir forgangsröðun sköpum.



Uppbygging atvinnulífsins

Forsenda uppbyggingar efnahagskerfisins er að koma hjólum atvinnulífsins af stað. Við verðum að ganga hreint til verks og skjóta traustum stoðum undir rekstrarumhverfi fyrirtækja. Lykilatriði í endurreisn hagkerfisins er að auka útflutningstekjurnar. Fyrirtæki þurfa að fá greiðari aðgang að fjármagni á viðunandi kjörum, til dæmis með því að stofna tímabundinn sjóð þar sem fyrirtæki gætu leitað eftir fjármagni til að endurfjármagna sig eða fá innspýtingu eiginfjár. Lífeyrissjóðir, ríki, sveitarfélög og aðrir aðilar gætu þarna lagt til fjármagn. Einnig er mikilvægt að ljúka endurskipulagningu bankanna eins hratt og auðið er. Auðvelda þarf beinar erlendar fjárfestingar hér á landi með skattaívilnunum.



Hagsmunir heimilanna

Heimilin eru ein mikilvægasta undirstaða samfélagsins og það er algjört lykilatriði að fólk haldi atvinnu sinni. Kappkosta þarf að verja gjaldmiðilinn þar til langtímalausn fæst í gjaldmiðilsmálum, bæði vegna daglegra útgjalda og stöðu myntkörfu- og verðtryggðra lána. Að mínu mati ætti langtímamarkmið að vera að afnema verðtrygginguna í skrefum, þannig að staða lífeyrissjóðanna sé tryggð. Koma þarf upp lánamarkaði að erlendri fyrirmynd þar sem hægt er að velja á milli breytilegra og fastra vaxta. Lykilatriði er að einstaklingar geti endurfjármagnað lán sín. Allt þetta skiptir höfuðmáli svo standa megi vörð um hagsmuni heimilanna.



Uppbygging hefjist sem fyrst

Ríkisfjármálum okkar er þröngur stakkur búinn og öllum er ljóst að fjárlagahalli er ekki langtímalausn. Við þurfum að taka á okkur erfiðan niðurskurð og því fyrr sem við gerum það, því fyrr getur uppbygging þjóðfélagsins hafist fyrir alvöru.



Hvetjandi skattkerfi

Við eigum að stefna að því að hafa hér eins einfalt skattkerfi og kostur er. Rannsóknir sýna að há stighækkandi skattprósenta hefur afar neikvæðar afleiðingar á hagvöxt, framboð vinnuafls og fjármunamyndun og skattkerfi má aldrei letja til vinnu og verðmætasköpunar. Einföld skattkerfi hafa einnig þann kost að færri leiðir eru til undanskota.



Land tækifæranna

Ég hef dvalist við störf í Bandaríkjunum síðastliðin fjögur ár ásamt fjölskyldu minni. Síðustu mánuði hefur sterk löngum knúið mig til að flytja aftur heim til Íslands og taka þátt í endurreisn samfélags okkar. Ég er mjög þakklát fyrir þau tækifæri sem íslenskt samfélag hefur veitt mér og ég vil tryggja að börn okkar allra njóti þessara tækifæra um langa framtíð. Ísland er sannarlega land tækifæranna og ég er tilbúin til að leggja mitt af mörkum til þess að svo verði áfram.

Guðrún Inga Ingólfsdóttir er hagfræðingur og býður sig fram í 4. sæti á lista Sjálfstæðisflokksins í Reykjavík.