Steingrímur: Björgólfur Thor þótti fínn pappír

„Ég tel að verkefnið sé gott og það yrði synd ef það strandaði á þessum þætti en ég er samt ekki að gera lítið úr þeim hluta," segir Steingrímur J. Sigfússon, fjármálaráðherra, aðspurður um aðkomu félags í eigu Björgólfs Thors Björgólfssonar að uppbyggingu gagnavers á Suðurnesjum.

Fyrirtækið sem um ræðir er Verne Holding, en það er að hluta í eigu Björgólfs Thors. Katrín Júlíusdóttir, iðnaðarráðherra, hefur verið gagnrýnd fyrir að gera samning sem felur í sér skattaívilnanir fyrir fyrirtæki í hans eigu.

Steingrímur var gestur í þætti Sigurjóns M. Egilssonar á Bylgjunni í morgun. Hann sagði fjármálaráðuneytið hafa komið að skattahluta samningsins sem að mati Steingríms er mun betri en þeir fjárfestingarsamningar sem voru gerðir við álverin á sínum tíma. Þessi samningur sé afmarkaðri í tíma, ívilnanirnar hóflegri og fyrirtækið komi miklu fyrr en álverin inn í venjulegt skattaumhverfi.

Steingrímur benti á að í haust hafi verið barið á fjármálaráðuneytinu fyrir að klára ekki að gera þennan samning út af atvinnuástandinu á Suðurnesjum. Um væri að ræða græna atvinnustarfsemi og sölu á orku. Steingrímur sagði að þetta hefði skyndilega breyst síðustu daga og áherslan og umræðan færst yfir á eignarhaldið.

„Menn verða þá að spyrja sig af því hvort við ætlum að stranda öllu verkefninu vegna þess að Björgólfur Thor lagði af stað með það fyrir einhverjum tveimur til þremur árum síðan. Þá þótti hann fínn pappír og menn voru voðalega ánægðir með þetta allt saman. Nú er andinn breyttur," sagði ráðherrann.

Steingrímur sagði að skoða þurfi málið vel. Fyrir liggi að eignarhlutur Björgólfs Thor komi til með minnka með innkomu nýrra eigenda. Þá benti Steingrímur á að Björgólfur Thor hafi ekki verið ákærður fyrir neitt. „Hann er í hópi útrásargaura og bankakarla sem hafa farið illa að ráði sínu og bakað okkar tjón. Við skulum takast á við það á forsendum réttarríkisins."

Fram kom í þættinum að Steingrímur bindur miklar vonir við skýrslu rannsóknarnefndar Alþingis.