Fellibyljavertíðin gengur í garð

Hitabeltisstormurinn Andrés geisaði við Kyrrahafsströnd Mexíkó í gær með allt að 100 kílómetra vindhraða á klukkustund. Andrés er fyrsti stormurinn sem hlýtur nafn í fellibyljavertíðinni sem nú er að hefjast við austanvert Kyrrahaf en búist er við að hann verði að fellibyl í dag samkvæmt spám fellibyljamiðstöðvar Bandaríkjanna. Gefin hefur verið út viðvörun til smábáta og eins hafa verið gerðar öryggisráðstafanir í Lazaro Cardenas, einni af stærri vöruflutningahöfnunum við Kyrrahafsströnd Mexíkó.