Beckham óttaðist að landsliðsferlinum væri lokið

David Beckham hefur viðurkennt að hann hélt að landsliðsferli sínum væri lokið þegar að Steve McClaren þáverandi landsliðsþjálfari setti hann út í kuldann eftir HM 2006.

Beckham var fyrirliði enska landsliðsins allt þar til að liðið féll úr leik á HM í Þýskalandi. Hann ákvað sjálfur að gefa frá sér fyrirliðastöðuna en það var McClaren sem ákvað að hætta að velja Beckham í enska landsliðið.

McClaren ákvað þó að endurskoða ákvörðun sína eftir að hann fór á kostum með Real Madrid og hefur eftirmaður hans, Fabio Capello, verið duglegur að velja Beckham í sína landsliðshópa.

„Ég hef gengið í gegnum nokkrar lægðir á mínum ferli. Ein þeirra var þegar ég komst ekki í landsliðið. Það hafði slæm áhrif á sjálfstraustið mitt. Ég átti ekki von á því að ég myndi spila aftur með landsliðinu. Ég hélt að þeim kafla væri lokið," sagði Beckham.

Beckham getur á morgun þegar England mætir Slóvakíu á Wembley spilað sinn 109. landsleik og þar með bætt met Bobby Moore sem hefur spilað flesta landsleiki í sögu enska landsliðsins fyrir utan markverði.