Óvíst hvar Jackson hvílir til frambúðar

Óljóst er hvort Forest Lawn-kirkjugarðurinn í Glendale í Kaliforníu verður hinsti hvílustaður poppgoðsins Michales Jackson. Jarðneskar leifar hans munu þó að minnsta kosti hvíla þar fyrst um sinn en athöfnin fór fram í gærkvöldi. Aðeins fjölskylda Jacksons og nánustu vinir hans voru við athöfnina og að henni lokinni héldu þau á ítalskan veitingastað í Pasadena og snæddu þar kvöldverð. Fregnir herma að fjölskyldan sé ekki á einu máli um hvar rétt sé að Jackson hvíli og því ekki útilokað að lík hans verði flutt þegar fram líða stundir.