Kjartan Henry lánaður til Falkirk

Kjartan Henry Finnbogason var í dag lánaður til skoska úrvalsdeildarfélagsins Falkirk en hann er samningsbundinn Sandefjord í Noregi.

Lánssamningurinn gildir til áramóta en þá á Falkirk möguleika á að kaupa hann til félagsins.

Fram kom á heimasíðu Falkirk í kvöld að það hafi verið langur aðdragandi að félagaskiptunum. Félagið hafi viljað fá Kjartan út leiktíðina en þar sem norska deildin byrjar í apríl kom það ekki til greina.

Kjartan Henry hóf atvinnumannaferilinn í Skotlandi en hann var á mála hjá Celtic áður en hann hélt til Noregs. Hann náði þó aldrei að spila með aðalliði Celtic. Hann lék með KR hér á landi.

Falkirk mætir á morgun Dundee United og gæti Kjartan Henry komið við sögu í leiknum.