Shevchenko: Ætlar að skora sitt 40. landsliðsmark á Wembley

Andriy Shevchenko bíður spenntur eftir landsleik Úkraínumanna og Englendinga á Wembley á miðvikudaginn.

„Mig dreymir um að skora mitt fertugasta landsliðsmark á Wembley og að það mark hjálpi okkur til að komast áfram," sagði Andriy Shevchenko sem hefur skorað 39 mörk í 85 landsleikjum með Úkraínu.

England er með fimm stiga forskot á Úkraínu fyrir leikinn en Úkraína á leik inni og er því í ágætum málum nái liðið góðum úrslitum í London.

Andriy Shevchenko ætlar sér örugglega að sýna sig og sanna og það má búast við að það verði margir stuðningsmenn Chelsea í stúkunni sem sáu hann aðeins skora 9 mörk í 47 leikjum fyrir Chelsea.

Hinn 32 ára gamli framherji hefur aðeins fengið að byrja inn á í tveimur leikjum síðan að hann snéri aftur til AC Milan í haust.

„Landsliðið gefur mér tækifæri að gera það sem ég elska sem er að spila fótbolta. Það er samt ekki auðvelt fyrir landsliðsþjálfarann að velja leikmann í liðið sem er ekki að spila reglulega fyrir sitt félagslið," viðurkennir Shevchenko.

„Þetta er stór leikur fyrir okkur. Við vitum að England er eitt af sterkustu liðunum og við vonumst til að geta náð góðum úrslitum. Við erum með ungt lið sem getur vaxið og dafnað," segir Andriy Shevchenko sem ætlar að miðla reynslu sinni til liðsins.

„Ég stefni á að spila í annarri heimsmeistarakeppni, þessi leikur er mikilvægur en lykilleikurinn fyrir okkar er á móti Króötum í júní," sagði Shevchenko.

Þetta verður fyrsti leikur hans á nýja Wembley því hann var meiddur þegar Chelsea spilaði þar á sínum tíma.