Brasilíumenn orðnir jafntefliskóngar í Suður-Ameríku

Undankeppni HM 2010 ætlar að reynast Brasilíumönnum erfiðari en oft áður. Eftir enn eitt jafnteflið um helgina þá er brasilíska landsliðið komið niður í 4. sæti í Suður-Ameríku riðlinum með 18 stig úr 11 leikjum.

Fjögur efstu liðin fara beint á HM og liðið í fimmta sæti spilar umspilsleiki við lið úr Norður- og Mið-Ameríku.

Brasilíumenn hafa alltaf verið með á HM en fari hlutirnir ekki að lagast þá eiga þeir á hættu að lenda í vandræðum á lokasprettinum. Lendi þeir í fimmta sæti gæti liðið þurft að fara í gegnum Mexíkó ætli það að vera með á HM í Suður-Afríku 2010.

1-1 jafntefli brasilíska liðsins á móti Ekvador var sjötta jafntefli liðsins í 11 leikjum í undankeppninni en liðið hefur gert markalaust jafntefli í báðum leikjunum við Kólumbíu, 1-1 jafntefli í Perú og markalaust jafntefli á heimavelli á móti Bólivíu. Þeir eru því orðnir jafntefliskóngarnir í riðlinum.

Dunga, þjálfari brasilíska landsliðsins, hefur kennt ýmsu um, þar á meðal löngum ferðlögum og að liðið sé að leika leika við erfiðar aðstæður langt fyrir sjávarmáli. Hann sagði að úrslitin á móti Ekvador hafi verið eðlileg sem kallaði á öldu gagnrýnisradda úr öllum áttum.