Iwelumo vill sanna sig gegn Íslandi

Chris Iwelumo, leikmaður Wolves og skoska landsliðsins, vill ólmur fá tækifæri til að sanna sig í skoska landsliðsbúningnum er liðið mætir því íslenska á Hampden Park á morgun.

Þegar Skotland lék við Holland um helgina stillti George Burley landsliðsþjálfari upp nokkuð varnarsinnuðu liði með Kenny Miller einan í framlínunni.

Það þykir líklegt að Burley muni stilla upp sókndjarfara liði á morgun og jafnvel með tvo framherja - Miller og Iwelumo.

Iwelumo öðlaðist heimsfrægð þegar hann brenndi af algeru dauðafæri í markalausu jafntefli Skota og Norðmanna fyrr í undankeppninni en myndbrot af atvikinu fór um internetið eins og eldur í sinu.

„Þessi leikur verður mjög frábrugðinn leiknum gegn Hollandi," sagði Iwelumo í samtali við skoska fjölmiðla. „Ég á von á því að við sækjum á tveimur mönnum en ekki einum og að við verðum meira með boltann. Það er undir okkur komið að stýra spilinu í leiknum."

„Ég held að við munum spila samkvæmt 4-4-2 leikkerfinu. En það er bara mín skoðun. En miðað við það sem ég hef heyrt tel ég að það verði tilfellið."

„Við erum með sjálfsöryggið í lagi og á miðvikudaginn vona ég að við getum tryggt þjálfaranum hans fyrsta sigur á Hampden Park."

Síðan George Burley tók við skoska landsliðinu hefur það fjórum sinnum leikið á Hampden Park. Þar af hefur liðið gert þrjú jafntefli og tapað einum leik. Skotar hafa ekki skorað síðan fyrsta leiknum af þessum fjórum en það var 1-1 jafntefli gegn Króatíu.

Iwelumo sagðist enn fremur þekkja ágætlega til íslenska liðsins.

„Það vita allir hvað Eiður Guðjohnsen getur. Það skiptir engu þótt við sækjum stíft á þá allan leikinn - hann getur alltaf breytt gangi leiksins. Það eru líka fleiri góðir leikmenn í þessu liði eins og í öllum öðrum liðum."

„Finnar sýndu gegn Wales að það er allt hægt í þessu. Við erum að fara að mæta bestu leikmönnum Íslands í þessum leik og þeir hafa spilað um allan heim."

„Við vitum vel að það er pressa á okkur en það er þannig í hverjum einasta leik."