Theodór Elmar: Vil sanna mig á Hampden

Theodór Elmar Bjarnason vill ólmur sýna sig og sanna fyrir skoskum áhorfendum þegar íslenska landsliðið mætir því skoska á Hampden Park í Glasgow á morgun.

Hann lék lengi með unglinga- og varaliði Celtic og á fáeina leiki að baki með aðalliðinu. Hann fékk sig hins vegar lausan undan samningi sínum við félagið þegar ljóst varð að tækifærin yrðu af skornum skammti og leikur hann nú með Lyn í Noregi.

„Það er mjög fínt að vera kominn aftur til Skotlands og hlakka ég til leiksins," sagði hann en vildi lítið segja um hvort hann telji það líklegt að hann komi við sögu í leiknum. „Það er bara undir þjálfaranum komið," sagði hann sposkur.

En hann sagðist vitanlega spenntur fyrir því að fá að spreyta sig. „Það var auðvitað svekkjandi að fá ekki að spila meira með Celtic og því vil ég gjarnan fá að sýna mig og sanna fyrir skoskum áhorfendum á þessum leik."