Spilar með landsliðinu þvert á óskir Benitez

Yossi Benayoun hefur ákveðið að gera allt sem í sínu valdi stendur til að spila með ísraelska landsliðinu gegn því gríska í undankeppni HM 2010 um helgina.

Þetta gerir hann þvert á óskir Rafael Benitez, knattspyrnustjóra Liverpool, en Benayoun hefur verið frá síðustu tvær vikur vegna meiðsla.

Hann viðurkennir að þetta hafi verið vandamál hjá Liverpool. „Þeir vildu í raun ekki að ég kæmi til Ísrael. En ef ég get lagt mig allan fram mun ég gera það, jafnvel þótt ég eigi það á hættu að meiðast," er haft eftir honum í enskum fjölmiðlum.

„Ég hef verið að ganga í gegnum stífa endurþjálfun síðustu vikurnar og er næstum leikfær. Ég finn þó stundum fyrir meiðslunum."

„Ef ég myndi missa af leiknum á laugardaginn væru það mestu vonbrigði míns ferils. Mér líður miklu betur nú og ég vona að ég geti æft með liðinu fljótlega. Ef það gerist mun ég geta spilað."