Fá fimm vikur til að bjarga fjármálunum

„Við höfum veitt bæjarstjórn Álftaness frest til 20. janúar næstkomandi til að koma fjármálum sveitarfélagsins á réttan kjöl,“ segir Kristján L. Möller sveitarstjórnarráðherra.

Eins og kom fram í Fréttablaðinu í gær er fjárhagsstaða Álftaness vonlítil. Bæjarstjórnin er í samvinnu við eftirlitsnefnd um fjármál sveitarfélaga að reyna að ráða fram úr vandanum. Kristján segir það liggja skýrt fyrir í sveitarstjórnarlögum hvað gerist takist bæjarstjórninni ekki að ráða fram úr vandanum áður en fresturinn er á enda. „Komi í ljós að greiðslubyrðin verði áfram umfram greiðslugetu og sé það mikil að ekki muni úr rætast í bráð höfum við heimild til að skipa sveitarfélaginu fjárhaldsstjórn,“ segir ráðherrann.

Skýrsla eftirlitsnefndarinnar um Álftanes hefur enn ekki fengist afhent. Mismunandi túlkanir eru á því hvað teljist vera skuldir sveitarfélagsins. Fulltrúar þess meirihluta sem fór með völd í bæjarfélaginu frá því eftir kosningar 2006 og þar til í sumar segja til dæmis skuldirnar nú standa í ríflega 4 milljörðum króna.

Kristján L. Möller dregur hins vegar upp aðra mynd af skuldastöðu Álftaness. „Skuldirnar eru 7,4 milljarðar,“ segir ráðherrann. „Þar af eru skuldbindingar utan efnahags tæpir þrír milljarðar sem eru einkum vegna langtímasamninga við eignarhaldsfélagið Fasteign.“

Pálmi Másson, bæjarstjóri Álftaness, vill ekki tjá sig um skuldastöðuna að svo stöddu. „Við ráðgerum íbúafund, sennilega á fimmtudag, þar sem farið verður yfir niðurstöður skýrslunnar,“ segir Pálmi.

Bæjarstjórinn kannast ekki við að ráðuneytið hafi sett Álftanesi formleg tímamörk. Pálmi, ásamt Kristni Guðlaugssyni, forseta bæjarstjórnar, og Margréti Jónsdóttur, formanni bæjarráðs, áttu síðdegis í gær fund með fulltrúum eftirlitsnefndar með fjármálum sveitarfélaga. Pálmi segir viðræður halda áfram í dag. „Svo má vænta þess að öðru hvorum megin við helgi liggi fyrir eitthvert samkomulag milli bæjarstjórnar og ráðuneytisins um þennan tíma sem ráðherrann nefndi,“ segir hann.

Sveitarstjórnarráðherra segir að ákveðið hafi verið að Álftanes fái fyrirframgreiðslu úr jöfnunarsjóði sveitarfélaga til að geta greitt laun og aðrar forgangskröfur á næstu vikum.

Meðal úrræða sem Álftanes hefur samkvæmt lögum er að óska eftir leyfi ráðherra að hækka álögur á íbúana um allt að 25 prósent. Pálmi segir engar ákvarðanir hafa verið teknar um slíkt af hálfu bæjarstjórnar.

gar@frettabladid.is