Starfsfólki í Þykkvabæ mjög brugðið

Starfsfólkinu í Kartöfluverksmiðjunni í Þykkvabæ er mjög brugðið eftir að tvær starfsstúlkur slösuðust alvarlega í dag.

Starfsmaður í verksmiðjunni segir að starfsfólki hafi verið mjög brugðið. „Þeir sem komu að þessu eru miður sín, sem eðlilegt er," segir hann.

Sprengingin varð í majonestunnu. Lofti er dælt í tunnuna til þess að tappa majónesinu af henni. Lokið sprakk af tunnunni og urðu starfsstúlkurnar fyrir lokinu. Þær voru fluttar með þyrlum til Reykjavíkur alvarlega slasaðar.

Lögreglumenn og fulltrúar Vinnueftirlitsins eru á vettvangi og rannsaka tildrög slyssins. Ekki hafa fengist upplýsingar um líðan stúlknanna.