Glanspíurnar verða eftir heima

Enski landsliðsmaðurinn Rio Ferdinand segir að Fabio Capello hafi sett enska landsliðinu strangari reglur en forveri hans Sven-Göran Eriksson.

Eitt af því sem Ítalinn hefur tekið fyrir er fárið í kring um konur og kærustur ensku landsliðsmannanna, en þær skipa margar stóran sess á síðum slúðurblaðanna.

Svo virðist sem Capello hafi fengið nóg af fárinu í kring um eiginkonurnar og Ferdinand er ekki frá því að það sé að skila liðinu betri árangri í undankeppni HM.

"Þetta var orðið eins og sirkus þegar kom að konunum og kærustunum. Það var eins og væri alltaf sýning í kring um landsliðið og fótboltinn var í öðru sæti. Það var verið að spá í það hvernig fólk klæddi sig og hvert það væri að fara í stað þess að hugsa um leikina. Menn komast ekki á mörg stórmót á ferlinum og það er eins gott að hafa fulla einbeitingu," sagði Ferdinand í samtali við Sun.

Eiginkonur manna eins og Ashley Cole og David Beckham eru sjálfar stjörnur í tónlistinni, en nokkrar stúlkurnar hafa brotist til "frægðar" fyrir það eitt að vera með enskum landsliðsmönnum.