Segja ríkisstjórnina ekki ætla að taka mark á áliti

Þingflokkur Frjálslynda flokksins segir svar íslenskra stjórnvalda við áliti mannréttindanefndar Sameinuðu þjóðanna sem snýr að fiskveiðikerfinu staðfesta að ríkisstjórnarflokkarnir ætli ekki að taka mark á álitinu og halda áfram að brjóta mannréttindi. Þetta kemur fram í ályktun frá þingflokknum.

Frjálslyndir gagnrýna að engar breytingar á fiskveiðistjórnarkerfinu séu kynntar fyrir mannréttindanefndinni og einungis boðað að efnt verði til allsherjarskoðunar á kerfinu „í náinni framtíð", með breytingar í huga.

„Það er ótrúlegt að ríkisstjórnin skuli ekki taka alvarlega álit frá nefnd Sameinuðu þjóðanna, sem á að meta hvort mannréttindi séu í heiðri höfð hjá aðildarþjóðunum og hvort íslensk löggjöf samræmist skuldbindingum sem eru í þeim alþjóðlegu samningum sem íslensk stjornvöld og Alþingi hafa samþykkt að undirgangast. Á sama tíma leitar utanríkisráðherra Íslands eftir stuðningi þjóða heims við umsókn Íslendinga um sæti í Öryggisráðinu, þeirri stofnun sem tryggja á að mannréttindi séu haldin í heiminum," segir í ályktuninni.

Telur þingflokkurinn að ríkisstjórnin hefði strax og álit mannréttindanefndarinnar lá fyrir átt að leita eftir samráði við þingflokka stjórnarandstöðunnar og freista þess að ná samstöðu um nauðsynlegar breytingar á fiskveiðistjórnunarkerfinu svo tryggt væri að mannréttindabrot Íslendinga með núverandi kerfi heyrðu sögunni til.