Þórunn furðar sig á ályktun BÍ

Þórunn Sveinbjarnardóttir umhverfisráðherra furðar sig á því að Blaðamannafélag Íslands skuli saka hana um ritskoðun frétta og að félagið skuli álykta sérstaklega um myndatökur af hræi hvítabjarnar sem felldur var við bæinn Hraun á Skaga í síðustu viku.

Blaðamannafélagið gagnrýndi yfirvöld í gær fyrir að takmarka aðgang fréttamanna að ísbjarnarhræinu og sagði það ekki í verkahring yfirvalda að ákveða hvað væri myndað og hvað sagt.

Í tilkynningu frá umhverfisráðherra, sem er fyrrverandi blaðamaður, segir að fréttamenn á vettvangi hafi myndað hræ hvítabjarnarins að vild þegar lokið hafði verið við að taka sýni úr skepnunni, lögum og reglum samkvæmt. „Aðgangur að hræi skepnunnar var því ekki takmarkaður eins og stjórn Blaðamannafélagsins fullyrðir í ályktun sinni heldur öllum opinn þegar dýralæknar Umhverfisstofnunar höfðu lokið sýnatöku. Myndatökur voru því ekki hindraðar eins og glöggt mátti sjá í fjölmiðlum," segir í tilkynningunni.

Þar kemur einnig fram að umhverfisráðherra hafi ekki legið á þeirri skoðun sinni að myndir sem sýna skotmenn standa sigri hrósandi hjá bráð sinni, líkt og teknar voru á Þverárfjalli 3. júní, séu afar ógeðfelldar. Það breyti því ekki að aðgangur að hræi bjarndýrsins á Hrauni hafi ekki verið takmarkaður eftir að nauðsynlegum sýnatökum og rannsóknum var lokið og óskiljanlegt sé að stjórn Blaðamannafélags Íslands álykti með þessum hætti í ljósi staðreynda máls.