Magni meikar ekki myglað teppi

„Það er okkur í hljómsveitinni Á móti sól afar þungbært að þurfa að tilkynna að fyrirhugaður páskadansleikur okkar á Breiðinni fellur niður," segir í tilkynningu á heimasíðu hljómsveitarinnar Á móti Sól.

Ástæðuna segja liðsmenn sveitarinnar vera vegast sagt ömurlegt ástand hússins. Þeir bókuðu páskaballið með góðum fyrirvara hjá núverandi rekstraraðilum hússins, en fyrir nokkrum dögum tilkynntu þeir hljómsveitinni að þeir væru hættir dansleikhaldi en þeim væri velkomið að leigja húsið.

„Við tókum því fegins hendi, enda finnst okkur ómissandi hluti af hátíðahaldi um páskana að spila á Skaganum! En þegar við skoðuðum húsið, með aðstoð góðra vina okkar hér í bænum, runnu á okkur tvær grímur. Óþrifnaður og hreinn og klár viðbjóður blasti við, og alveg ljóst að slíkt væri ekki fólki bjóðandi. Klósett brotin, teppi mygluð, parketið á dansgólfinu orðið svo undið og bólgið að slysahætta stafar af o.s.frv."

Í tilkynningunni segir að þeir hafi undanfarna daga reynt allt sem í þeirra valdi standi til að reyna að koma staðnum í danshæft ástand, en þar sem enginn vilji sé fyrir slíku, hvorki hjá eigendum né rekstraraðilum staðarins verði þeir að játa sig sigraða.

„Við vonumst til að sjá ykkur síðar og óskum þess að þið eigið öll gleðilega páska."