Ekkert dregur úr umferð einkaþotna

Bölsýnistal um fjármálaheiminn virðist lítil áhrif hafa eina helstu birtingarmynd nýliðins góðæris - umferð einkaþotna um Reykjavíkurflugvöll. „Okkur virtist þetta vera frekar rólegt frá áramótum, en þegar við skoðuðum janúar fyrir ári síðan voru tölurnar svipaðar," segir Hrafnhildur Stefánsdóttir upplýsingafulltrúi Flugstoða.

Frá 1. til 21. janúar árið 2007 voru skráðar 88 „aðrar millilandahreyfingar", það er millilandaflug sem ekki er áætlana- eða leiguflug. Hreyfingar eiga bæði við um lendingar og flugtök, og því hafa 44 vélar farið um völlinn á þessu tímabili. Á sama tíma í ár voru skráðar 96 hreyfingar, og því þremur fleiri vélar á því tímabili. Megnið af þessari umferð er innlend, en eitthvað er um að erlendar vélar hafi hér viðkomu á leið yfir Atlantshafið.

Hrafnhildur segir auðveldara að segja til um breytingarnar með vorinu. Umferð aukist umferð iðulega með batnandi veðri, og mikil umferð hafi verið síðasta sumar. „Það er kannski í maí sem maður fer að taka eftir breytingum. Það verður spennandi að fylgjast með tölunum."