Ný mynd Parisar Hilton er sú versta í sögunni

Þrátt fyrir gríðarlega velgengni Parisar Hilton sem partýdýrs virðist hún illa ná að fóta sig í öðrum störfum. Platan sem hún gaf út í fyrra hlaut dræmar undirtektir, en nú er botninum náð.

Nýjasta framlag Parisar til kvikmyndaheimsins, The Hottie and the Nottie, seldi sem samsvarar 31 miða að meðaltali á bíóhús fyrstu sýningarhelgi sína. Vissulega slæmt, mjög slæmt meira að segja, en ekki verst á heimsvísu. Sá vafasami heiður náðist fyrst þegar farið var að dæma myndina.

Notendur kvikmyndasíðunnar IMDB hafa kosið The Hottie and the Nottie verstu mynd allra tíma. Hún hefur að meðaltali hlotið 1,1 stjörnu af tíu á síðunni, en raunar hafa margir notendur kvartað undan því að ekki sé hægt að gefa minna en eina stjörnu.

Flestar færslur á athugasemdakerfi síðunnar eru ekki uppörvandi fyrir Hilton og aðra aðstandendur myndarinnar. „Sálarskemmandi", „Viðbjóður" eru meðal þess sem notendur nota til að lýsa myndinni. Einn segir að horfa á hana sambærilegt við að horfa upp úr botni salernis og fylgjast með viðbjóði við því þegar hver kvikmyndasaurinn á fætur öðrum fellur á þig.

Hilton er alls ekki ókunnug listanum góða, en þar hafa síðustu tvær myndir hennar líka lent. „Pledge This" hlaut að meðaltali 1,6 stjörnur og hafnaði í sjöunda sæti yfir verstu myndirnar, á meðan „Bottoms Up" hlaut 1,9 stjörnur og lenti í 22. sæti. Spennandi verður svo að sjá hvernig fer fyrir næstu afurð stjörnunnar - rokk-hryllings-söngleiknum Repo! The Genetic Opera.