Amy Winehouse öll að koma til

Vandræðagemsinn fyrrverandi, Amy Winehouse, tekur stórstígum framförum í meðferð, að sögn móður hennar. Söngkonan vakti athygli á Grammy verðlaunahátíðinni fyrir frammistöðu sem átti lítið skylt við samhengislaust muldur sem hún hefur boðið upp á á tónleikum undanfarið ár.

Undanfarið ár hefur Amy vakið athygli fyrir afar skrautlegt líferni, og hefur fjölskylda hennar ítrekað reynt að fá hana til að fara í meðferð. Það tókst svo fyrir nokkrum vikum eftir að myndband birtist af henni reykja krakk. Mamman, Janis Winehouse, segir í viðtali á GMTV sjónvarpstsöðinni sem sýnt verður í dag að frammistaðan sýndi svart á hvítu að Amy væri að batna.

Grammy verðlaunin fimm sem Amy vann á sunnudagskvöldið voru rúsínan í pylsyendanum fyrir Amy, en plata hennar, Back To Black, hefur selst í fimm milljónum eintaka og rakað að sér verðlaunum.