Fyrstu myndirnar af nýju afþreyingarkerfi Icelandair

Um helgina verður nýjum bæklingi Icelandair dreift á öll heimili í landinu. Bæklingurinn ber nafnið „Mín borg" og verður stærsti ferðabæklingur Icelandair frá upphafi.

Í bæklingnum birtast í fyrsta sinn myndir af nýju afþreyingarkefi og sætum sem flugfélagið hyggst setja um borð í allar Boeing 757 vélar sínar.

Með tilkomu nýja kerfisins mun hver farþegi hafa sinn eigin skjá í sætisbakinu fyrir framan sig. Farþegar geta í kerfinu valið á milli fjölbreytts úrvals af nýlegum kvikmyndum, sjónvarpsþáttum, tónlist og tölvuleikjum, eftir smekk hvers og eins. Þá verður hægt að fylgjast með flugferðinni á skjánum, og sækja upplýsingar um flughafnir.

Þá segir í bæklingnum að nýju sætin séu með leðuráklæði, séu léttari, sterkari og taki minna pláss en þau sem fyrir eru. Því sé rýmra um farþegana.

Hægt verður að nálgast bæklinginn í Hagkaupum á morgun, en þar munu næstu ellefu daga standa yfir ferðadagar. Í tilefni þeirra verður verslunum Hagkaupa umbylt frá og með morgundeginum. Þær allar klæðast „icelandair-bláum lit", kassar dressaðir upp sem hlið á flugvelli og reglulega heyrist flugstjóri og flugfreyjur ávarpa „farþega" í hljóðkerfi verslunarinnar. Þá verða fimmtíu ferðavinningar verða dregnir út úr kassakvittunum viðskiptavina næstu ellefu daga.