Oprah gerir manninn arflausan

Oprah Winfrey ætlar ekki að láta það ráðast fyrir slysni hver erfir auðæfi hennar. Spjallþáttadrottningin skrifaði nýlega erfðaskrá, og samkvæmt heimildum National Enquirer fær maður hennar ekki krónu að henni genginni.

Góðgerðarsamtök, og börn sem hún hyggst ættleiða munu fá stærstan skerf af fúlgunni, en Stedman Graham, maki hennar til rúmlega tuttugu ára fær ekki aur.

Oprah ætlar einn góðan veðurdag að ættleiða þrjár stúlkur, og ala þær ein, að sögn heimildamanns blaðsins. Hann segir að þetta hafi hana langað til að gera lengi, og aldrei hafi verið inn í myndinni að ala þær upp með Stedman.

Fari svo að Oprah hrökkvi upp á undan honum mun Stedman því að öllum líkindum þurfa að draga fram lífið á töluvert minni auðæfum sínum, sem hann hefur þénað sem metsölurithöfundur og ræðumaður.