Ólafur Örn meðal þriggja sem komu til greina í starf ferðamálastjóra

Ólafur Örn Haraldsson, fyrrverandi forstjóri Ratsjárstofnunar og forseti Ferðafélags Íslands, var einn þeirra þriggja sem komu helst til greina í starf ferðamálastjóra en ráðið var í stöðuna á dögunum. Ársæll Harðarson, forstöðumaður markaðssviðs Ferðamálastofu, sem einnig var í þriggja manna hópnum, íhugar að leita eftir rökstuðningi iðnaðarráðherra fyrir ráðningunni.

Félag háskólamenntaðra ferðamálafræðinga hefur sent frá sér yfirlýsingu þar sem segir að ráðning nýs ferðamálastjóra sé á skjön við þróun íslenskrar ferðaþjónustu. Er þar gagnrýnt að ráðherra hafi ráðið líffræðinginn Ólöfu Ýrr Atladóttur til starfans en horft fram hjá umsækjendum með sérhæfða háskólamenntun á sviði ferðamála.

Samkvæmt tilkynningu frá iðnaðarráðuneytinu á Ólöf Ýrr að baki fjölbreytt nám í stjórnsýslu- og þróunarmálum, náttúruvísindum og íslensku í Háskóla Íslands og University of East Anglia. „Ólöf Ýrr hefur góða þekkingu á alþjóðamálum og hefur lagt sérstaka áherslu á breytingastjórnun. Hún hefur reynslu á sviði ferðaþjónustu úr landvörslu og fararstjórn, og var einnig forstöðumaður Kviku, fræðagarðs við Mývatn," sagði enn fremur í tilkynningu ráðuneytisins þegar ráðið var til starfans. Þar kom einnig fram að ráðherra hefði valið Ólöfu Ýrr með tilliti til forystuhæfileika og markmiðs jafnréttislaga.

Hefur ekki ákveðið hvort hann óski eftir rökstuðningi ráðherra

Athygli vekur að Ólafur Örn Haraldsson var ekki ráðinn til starfans enda hefur hann mikla reynslu af bæði ferðamálum og úr stjórnsýslunni. Ólafur er með meistarapróf í landfræði frá breskum háskóla og benti á í samtali við Vísi í morgun að hann hefði áratuga reynslu af ferðamálum. Hann hefði meðal annars unnið í nokkur ár hjá innanlandseild Útsýnar og komið að mikilli uppbygginu hjá Ferðafélagi Íslands. „Svo hef ég verið skálavörður og landvörður. Ég tók það ekki fram í umsókninni en ég hefði kannski átt að gera það," segir Ólafur.

Ólafur gegndi auk þess þingmennsku fyrir Framsóknarflokkinn í átta ár og þar af var hann sex ár formaður umhverfisnefndar sem fjallaði allmikið um ferðamál að sögn Ólafs. Ólafur var forstjóri Ratsjárstofnunar í þrjú ár en hætti þar á síðasta ári í kjölfar þess að íslensk stjórnvöld tóku við rekstri stofnunarinnar.

Aðspurður sagði Ólafur að hann hefði ekki hugleitt það hvort hann hygðist óska eftir rökstuðningi frá ráðherra vegna málsins. Umsækjendur hafa frest til þess til 14. janúar.