Baltasar Kormákur dansaði uppi á borði á nýársfagnaði

Mikið var um dýrðir á stjörnuprýddu Galakvöldi á hótel Loftleiðum í gær. Tæplega þrjúhundruð gestir mættu á ballið og eftir fjöruga veislu tróðu Stebbi Hilmars, Helgi Björns, Magni og Einar Ágúst upp. Baltasar Kormákur leikstjóri kunni vel að meta tónlistina og dansaði uppi á borði þegar veislan stóð sem hæst.

Þegar samkvæminu lauk upp úr fimm í morgun nýttu um hundrað gestir sér tilboð um að gista á Loftleiðum, enda væntanlega þreyttir eftir hamaganginn.

Quentin Tarantino og félagi hans Eli Roth létu sig að sjálfsögðu ekki vanta. Tarantino vakti sérstaka athygli fyrir frjálslegan klæðaburð. Fyrr um kvöldið hafði verslun Blend í Kringlunni verið opnuð sérstaklega fyrir leikstjórann, svo hann gæti fengið sér jakkaföt og verið sómasamlega klæddur í veislunni. Starfsstúlka í búðinni beið í tvo tíma eftir Tarantino, sem kom þó aldrei. Hann mætti svo hress á ballið í hettupeysu og gallabuxum.