Skorað á karlinn Árna að hlusta á eðlilegar launakröfur kvenna

Skorað var á karlinn Árni Mathiesen fjármálaráðherra að hlusta á konurnar sem krefjast eðilegra launa í umræðum á Alþingi í morgun um kjaradeilu ljósmæðra. Formaður heilbrigðisnefndar þingsins sagði óviðunandi að störf ljósmæðra væru metin til tugþúsunda lægri launa en karlastétta hjá ríkinu.

Katrín Jakobsdóttir, varaformaður Vinstri - grænana, kvaddi sér hljóðs við upphaf þingfundar og minnti á að Árni M. Mathiesen fjármálaráðherra hefði sagt í gær að hann vonaði að ekki kæmi til verkfalls ljósmæðra. Það hefði engu að síður skollið á. Sagði Katrín deiluna ekki aðeins snúast um kjör ljósmæðra heldur öryggi verðandi mæðra því þjónusta við þær væri nú skert. Spurði hún Ástu Möller, formann heilbrigðisnefndar, hvernig nefndin myndi beita sér í málinu og minnti á að fleiri verkföll væru yfirvofandi hjá ljósmæðrum.

Eðlilegar kröfur ljósmæðra

Ásta Möller svaraði því til að hún hlyti að lýsa vonbrigðum með að til verkfalls hefði komið. Kröfur ljósmæðra væru á rökum reistar og það væri ekki viðunandi að störf kvennastétta væru metin til tugaþúsunda lægri launa en karlastétt. Þetta væru slæm skilaboð til kvenna sem vildu læra ljósmæðrafræði.

Þá sagði Ásta að ljósmæður byndu miklar vonir við ákvæði stjórnarsáttmálans um að laun kvennastétta yrðu leiðrétt og sagðist hún fagna því að nefnd fjármálaráðherra og félagsmálaráðherra myndi skila niðurstöðum um aðgerðir í haust. Sagði hún enn fremur að bæði fulltrúar ljósmæðra og stofnana hefðu sýnt mikla ábyrgð við þessar aðstæður og að barnshafandi konur gætu gengið að öruggri þjónustu.

Jóhanna komi úr felum

Siv Friðleifsdóttir, þingflokksformaður Framsóknarflokksins, benti á að þegar BSRB hefði í vor gert samninga við ríkið þá hefði ekki verið hægt að leiðrétta kjör kvenna. Jóhanna Sigurðardóttir félagsmálaráðherra hefði sagt að það myndi reyna á stjórnarsáttmálann varðandi þetta mál. Þá hefði hún einnig sagt að það yrði að lyfta konum upp í launum án þess að karlarnir fylgdu eftir.

Siv sagði Ástu Möller segja að kjör ljósmæðra væru ekki viðunandi en flokksbróðir hennar Árni Mathiesen fjármálaráðherra segði efnahagsástandið of erfitt til þess að leiðrétta kjör ljósmæðra. Skoraði Siv á karlinn Árna Mathiesen að hlusta á konurnar sem krefðust eðlilegra launa og sömuleiðis að hlusta á konuna Ástu Möller sem segði að ástandið væri ekki viðunandi. Þá skoraði Siv á Jóhönnu Sigurðardóttur að fela sig ekki heldur stíga fram og þrýsta á fjármálaráðherra.

Innbyggt óréttlæti ekki leiðrétt í einni svipan

Steinunn Valdís Óskarsdóttir, þingmaður Samfylkingarinnar, sagði engan deila um að staðan væri alvarleg og hún tók undir með öðrum þingmönnum að það væri óviðunandi að störf ljósmæðra væri ekki metin að verðleikum.

Sagðist hún telja út frá mikilli reynslu sinni hjá borginni að þar sem vilji væri til að leiðrétta væri vegur. Það væri pólitískur vilji hjá ríkisstjórninni til að leiðrétta kjör kvennastétta en innbyggt óréttlæti yrði ekki leiðrétt í einni svipan. Málið yrði tekið fyrir á jafnréttisþingi í haust þar sem kynntar yrðu tímasettar aðgerðir. Steinunn Valdís sagðist hafa átt samtöl við deiluaðila í morgun og að hún treysti því að deilan leystist á næstu dögum.