Pólverji á fimmtugsaldri lést í vinnuslysi

Fjörtíu og sex ára gamalla pólskur karlmaður lést í vinnuslysi í morgun um borð í skipinu Selfossi sem liggur við Hafnarfjarðarhöfn.

Slysið varð um klukkan átta í morgun og varð með þeim hætti að maðurinn klemmdist á milli gáms og skilrúms þegar verið var að hífa gáma um borð. Þær upplýsingar fengust hjá Eimskipafélaginu, sem á skipið, að nokkuð hvasst hafi verið á vettvangi þegar slysið varð og virðist gámurinn hafa fokið til.

Maðurinn var hins vegar starfsmaður Atlantsskipa sem sinnti verktöku við lestunina. Lögregla fer með rannsókn málsins ásamt Vinnueftirlitinu.