Pétur Markan til Vals

Pétur Georg Markan gengur í dag til liðs við Val en þetta staðfesti hann í samtali við Vísi.

„Það er rétt. Það verður gengið frá málunum í dag," sagði Pétur sem hefur undanfarin fjögur ár leikið með Fjölni.

„Ástæðan fyrir því að ég valdi að ganga til liðs við Val var að ég tel að félagið sé með metnaðarfulla áætlun fyrir næsta sumar. Ég er einnig á þeim aldri sem hentar vel til þess að skipta um félag. Mér finnst þetta afar spennandi enda er Valur félag með góða sögu og byggir á góðum gildum. Það er gaman að vera þátttakandi í því."

Hann kveður þó Fjölni með trega. „Þetta hefur verið mikill umbreytingartími með Fjölni. Ég kom til félagsins þegar að Ásmundur (Arnarsson) var að taka við og ég held að við höfum verið átta á einni æfingunni í október þegar við byrjuðum. En ég er mjög meðvitaður um að Fjölnir gaf mér tækifæri sem ég er afar þakklátur fyrir. Ég held að báðir aðilar hafi þjónað hvorum öðrum vel."

Pétur bætist í hóp þeirra Ian Jeffs og Reynis Leóssonar sem gengu til liðs við Val nú á haustmánuðunum. Auk þess sneri Kristján Hauksson aftur til félagsins frá Fjölni eftir að hafa verið í láni þar í sumar.

Pétur var laus undan samningi sínum hjá Fjölni og segir að efnahagsástandið hafi ekki haft mikið að segja um ákvörðun sína að fara til Vals.

„Ég var ekki að leita eftir salti í grautinn þegar ég gekk til liðs við Val."