Telur óþarfi að banna fjárfestingar þingmanna og ráðherra

Árni Páll Árnason, þingamaður Samfylkingarinnar, telur ekkert óeðlilegt við það að fjármálaráðherra landsins, Árni M. Mathiesen, sé stofnfjáraðili í Byr. Hann telur hins vegar réttast að setja upplýsingalög sem myndu opinbera hlutafjáreign þingmanna og ráðherra.

Eins og koma fram á Vísi í kvöld er Árni M. Mathiesen einn af stofnfjáraðilum Byrs og vísaði hann því algjörlega á bug að eitthvað rangt væri við að fjármálaráðherra væri fjárfestir í íslenskri fjármálastofnun. Árni vildi reyndar ekki gefa upp hversu stór hlutur hans væri í Byr, það væri hans einkamál.

Formaður Samfylkingarinnar og utanríkisráðherra, Ingibjörg Sólrún Gísladóttir, lét hafa það eftir sér fyrir stuttu að til stæði að setja siðareglur fyrir þingmenn og opinbera embættismenn og í því ferli hafi verið rætt um að koma fjárfestingum og hlutabréfaviðskiptum þingmanna og ráðherra upp á yfirborðið fyrir sjónir almennings. Árni Páll staðfestir þetta og finnst sú lausn réttmætust. Unnið verður að reglunum í haust.

Árni Páll segir óþarfi að banna alfarið fjárfestingar ráðherra og þingmanna, því ef hlutafjáreignir séu uppi á yfirborðinu dæmi það sig alltaf sjálft hvort hvort einhver sé vanhæfur að sinna ákveðnum verkefnum vegna tengsla.