Eyjamenn enn með fullt hús stiga

Heil umferð fór fram í fyrstu deild karla í knattspyrnu í kvöld. ÍBV er enn með fullt hús stiga eftir 3-0 sigur á Fjarðabyggð.

Bjarni Rúnar Einarsson kom ÍBV yfir með marki á 42. mínútu. Eyjamenn gerðu svo út um leikinn á tveggja mínútna kafla í upphafi síðari hálfleiks. Andri Ólafsson skoraði annað mark ÍBV á 49. mínútu og Augustine Nsumba það þriðja mínútu síðar.

Stjarnan vann einnig góðan 3-0 sigur á Þór á útivelli og þá vann Njarðvík 1-0 sigur á KA suður með sjó.

Leiknir og Víkingur Ó. gerðu markalaust jafntefli og þá gerðu KS/Leiftur og Víkingur R. einnig jafntefli, 1-1.

Að síðustu vann Selfoss sigur á Haukum í Hafnarfirði, 3-1.

ÍBV er í efsta sæti deildarinnar með fimmtán stig og Selfyssingar eru í því öðru með þrettán stig. Þá er Stjarnan í þriðja sæti með tíu stig.

KS/Leiftur og Leiknir eru á botni deildarinnar en bæði lið eru enn án sigurs.