Vill fá bætur vegna árásar nýborinnar kýr

Í dag felldi Hæstaréttur úrskurð í máli þar sem stúlka fer fram á greiðslu skaðabóta vegna þess að hún hafi orðið fyrir líkamstjóni við rekstur nýborinnar kýr í ágúst árið 2002. Málinu var vísað aftur í hérað.

Í dómi Hæstaréttar segir:

„Óumdeilt er að kýrin réðst skyndilega á stefndu, stangaði hana og felldi og traðkaði á andliti hennar og að hún hafi við þetta orðið fyrir því tjóni sem krafist er bóta fyrir...."

Stúlkan sem var 14 ára gömul þegar atvikið átti sér stað var stödd hjá kúnni með föður eiganda hennar og byggir hún kröfu sína á því að eigandinn hafi sýnt af sér saknæma háttsemi með því að láta hana, 14 ára gamla og óvana kúm, reka úr haga nýborna kú, án þess að hún hafi fengið viðeigandi leiðbeiningar og viðvaranir.

Ráðunautur hjá bændasamtökum Íslands var fenginn til þess að vinna matsgerð um málið þar sem meðal annars eru rakin atriði um hegðun nýborinna kúa.

„ Hins vegar fer hinn dómkvaddi maður nokkuð út fyrir matsefnið með því að leggja mat á sök áfrýjanda með þeim hætti er þar greinir. Hann hvorki hélt formlegan matsfund né skoðaði kúna sem matsspurningar lutu að, þótt sérstaklega hafi verið beðið um mat á eiginleikum kýrinnar," segir í dómnum.

Málinu var því vísað aftur til Héraðsdóms og telur Hæstiréttur þá rétt að héraðsdómari kveðji til tvo sérfróða meðdómsmenn sér til fulltingis til setu í dóminum.