Samfylkingin með meirihluta í borginni

Samfylkingin hlyti meirihluta í borgarstjórn Reykjavíkur, átta borgarfulltrúa, gengi það eftir sem fram kemur í könnun Félagsvísindastofnunar Háskóla Íslands. Morgunblaðið segir frá þessu í morgun en könnunin var framkvæmd fyrir Samfylkinguna dagana 2. - 22. júní.

Fylgi Samfylkingarinnar í könnuninni mælist 48,2 prósent en fylgi Sjálfstæðisflokks 29,2 sem myndi skila honum fimm fulltrúum. Vinstri hreyfingin - grænt framboð fengi 17 prósenta fylgi og tvo fulltrúa.

Miðað við könnun Gallup í maí bæta bæði Samfylking og Sjálfstæðisflokkur við sig nokkrum prósentustigum. Af þeim sem afstöðu tóku vildu 53,7 prósent fá Dag B. Eggertsson sem borgarstjóra en 26,8 prósent Hönnu Birnu Kristjánsdóttur.