Guðbjartur þingmaður ræður sér aðstoðarkonu

Guðrún Vala Elísdóttir hefur verið ráðin sem aðstoðarmaður Guðbjarts Hannessonar þingmanns. Guðrún Vala er búsett í Borgarnesi en ólst upp í Dölunum. Hún lauk stúdentsprófi frá Menntaskólanum í Hamrahlíð 1987, BA prófi í mannfræði frá Háskóla Íslands 1995, Bed próf frá Kennaraháskóla Íslands 1996, Diploma Ed í stjórnun 2001 og Diploma Ed í sérkennslufræðum 2004 frá framhaldsdeild Kennaraháskóla Íslands.

Hún stundar nám á meistarastigi í náms- og starfsráðgjöf við Háskóla Íslands. Guðrún Vala hefur starfað hjá Símenntunarmiðstöðinni á Vesturlandi frá 2006, þar sem hún sinnir náms- og starfsráðgjöf við fullorðna, stýrir verkefnum og kennir í fullorðinsfræðslu. Hún starfaði um árabil við Grunnskólann í Borgarnesi sem sérkennari og deildarstjóri sérkennslu og var skólastjóri í Laugargerðisskóla veturinn 1998-1999.

Frá 1995 hefur Guðrún Vala verið fréttaritari Morgunblaðins og greinahöfundur. Hún er ritari í stjórn ,,Okkar manna" félags fréttaritara. Hún var fulltrúi nemenda í námsnefnd í framhaldsdeild KHÍ 2003-04 og fulltrúi nemenda í deildarráði framhaldsdeildar KHÍ 2004.

Hún er formaður Félags íslenskra sérkennara, formaður og stofnandi Félags áhugafólks um margmenningu í Borgarfirði og var í stjórn Samfylkingarfélags Borgarfjarðar. Hún sat á síðasta kjörtímabili í félagsmálanefnd Borgarbyggðar og var jafnréttisfulltrúi nefndarinnar auk þess að sitja í barnaverndarnefnd Borgarfjarðar og Dala.

Hún var ennfremur stjórnarformaður Safnahúss Borgarfjarðar 2002-06. Guðrún Vala hefur mikinn áhuga á fullorðinsfræðslu, innflytjendamálum og jafnéttismálum. Eiginmaður Guðrúnar Völu er Gylfi Árnason útibústjóri Kaupþings í Borgarnesi. Þau eiga fjögur börn og eitt barnabarn.