Rauði baróninn stendur undir nafni

Garðar Örn Hinriksson lyfti fimm rauðum spjöldum á loft í leik Fram og Grindavíkur í gær. Það er þó ekki persónulegt „met" hjá Garðari.

„Eins fáránlega og það kann að hljóma er það ekki," sagði Garðar í samtali við Vísi í dag. „Ég dæmdi leik Dalvíkur og Gróttu í næstneðstu deild árið 1996 og þar fengu sex leikmenn rautt spjald. Þá þurfti að aflýsa leiknum."

Reglurnar sem voru í gildi þá kváðu um að ef fjórir leikmenn annars liðsins fengu rautt spjald þyrfti að blása leikinn af og dæma hinu liðinu 3-0 sigur. Ári síðar var reglunum hins vegar breytt og nú þurfa fimm leikmenn að fá rautt til að svo fari.

Alls fengu sjö leikmenn að líta rauða spjaldið í leikjum sjöttu umferðarinnar en tveir forráðamenn liðs Grindavíkur fengu einnig rautt að leiknum loknum. Það voru Milan Stefán Jankovic, þjálfari Grindavíkur og Ingvar Guðjónsson framkvæmdarstjóri knattspyrnudeildar félagsins.

Garðar segir að engin ein skýring sé að baki þessum mikla fjölda rauðu spjaldanna. „Leikurinn í gær var ekkert grófur," sagði Garðar. „Áherslurnar í dómgæslunni verða alltaf strangari með hverju árinu og gæti það hugsanlega verið ein skýringin."

„Ég get ekki dæmd hvert brot fyrir sig. En það skal viðurkennast að rauðu spjöldin hafa verið nokkuð mörg í sumar."

Hann segir að það hafi ekki verið erfitt fyrir hann að halda sínu striki í leiknum í gær. „Nei, mér fannst það ekki. En þegar leikurinn var búinn var maður sjálfur alveg búinn á líkama og sál. Þetta tekur mikið á."

Garðar segir sjálfur að hann hafi lítið gefið af rauðum spjöldum undanfarin ár en í fyrra gaf hann aðeins einum leikmanni rautt allt tímabilið.

„Þeim hefur þó fjölgað eitthvað á þessu ári án þess að ég viti af hverju," sagði Garðar sem hefur stundum verið kallaður rauði baróninn. „Jú, jú - það er einn og einn sem hefur kallað mig þessu nafni og ég lifi með því," sagði hann í léttum dúr. „Þetta er bara góðlátlegt grín sem ég tek þátt í."

Hann er heldur ekki orðinn smeykur við að dæma næsta leik. „Ef ég væri hræddur við að mæta í leiki væri ég löngu hættur þessu."