Fengu styrk úr Minningarsjóði Karls J. Sighvatssonar

Eva Þyrí Hilmarsdóttir, sem nýverið lauk einleikaraprófi í Danmörku, og Hákon Bjarnason, sem lýkur einleikaraprófi frá Listaháskóla Íslands í vor, fengu úthlutað samtals 400 þúsund krónum úr Minningarsjóði Karls J. Sighvatssonar.

Sjóðurinn var stofnaður skömmu eftir að Karl heitinn lést af völdum bíslyss sumarið 1991. Sjóðurinn hefur úthlutað fjölmörgum tónlistarmönnum styrkjum til framhaldsnáms í hljómborðsleik en jafnframt styrkt útgáfur nótnahefta, viðgerðir á orgelum og fleira.

Það var Jakob Frímann Magnússon, einn stofnenda sjóðsins, sem afhenti styrkina. Auk hans voru viðstödd Sigrún Karlsdóttir og Haukur Guðlaugsson en þau sitja bæði í sjóðstjórninni, þar sem Haukur hefur gegnt formennsku frá upphafi.